Síldarvinnslan hjá Vinnslustöðinni hefur gengið vel í haust þótt veður hafi stundum truflað veiðarnar. Unnið er á tveimur tólf tíma vöktum og koma hátt í 50 manns að vinnslunni á sólarhring. Þetta kemur fram í myndbandsviðtali við Sindra Viðarsson, sviðsstjóra uppsjávarsviðs, á vef Vinnslustöðvarinnar.

Sindri segir vinnsluna hafa hafist í fyrstu viku september og gerir ráð fyrir að hún standi í um tvær vikur til viðbótar. Skipin hafa komið með 700–1.000 tonn í löndun hverju sinni og tekur þrjár til fimm vaktir að vinna úr þeim afla.

Aðallega er nú unnin norsk-íslensk síld af miðunum fyrir austan land. Þegar viðtalið var tekið var öll síldarvinnslan í gangi og síldin heilfryst, flökuð og unnin í flapsa.

Í viðtalinu ræðir Sindri gang vertíðarinnar og starfsemina í uppsjávarvinnslunni. Hann vonast til að áfram gangi vel það sem eftir lifir síldarvertíðar og eftir góðri loðnuúthlutun á næstu dögum. Viðtalið við Sindra má sjá hér að neðan.