Um sextíu manns mættu á íbúafund HS Veitna í Eldheimum í gær. Þar fór Páll Erland, forstjóri fyrirtækisins yfir starfsemina. Eyjar.net leitaði viðbragða Írisar Róbertsdóttur, bæjarstjóra, en hún gerði athugasemdir við hluta málflutnings forstjórans.

„Ég er ánægð með að loksins var brugðist við kalli íbúa og bæjaryfirvalda um að HS Veitur myndu halda íbúafund í Eyjum. Forstjórinn fór yfir allar einingar starfseminnar hjá fyrirtækinu og hluti af því gott fyrir fundargesti að geta áttað sig á ólíkum einingum t.d. varðandi miklar hækkanir á gjaldskrá til húshitunar.

Ég hefði viljað fá skýrari svör hjá forsvarsmönnum fyrirtækisins við mörgum spurningum sem fram komu á fundinum og skýrari framsetningu í ákveðnum parti í kynningu forstjóra s.s. varðandi neðansjávar neysluvatnslögnina.

En það er gott að hefja samtalið við íbúa með fundi sem þessum til að útskýra m.a. miklar hækkanir eða breytingar í starfseminni og þarf fyrirtækið að halda því áfram.“

„Trúi því að ráðuneytið muni afhenda þau gögn sem uppá vantar“

Hvað finnst þér um svör ráðuneytisins um málið sem birt voru í gær?

Ég trúi því að ráðuneytið muni afhenda þau gögn sem uppá vantar til þess að hægt sé að fá glöggva mynd af forsendum fyrir hækkunum á gjaldskrá orku til húshitunar hér í Eyjum. Gögnin sem liggja fyrir í dag duga ekki til þess að gegnsæi sé í þessu ákvörðunarferli, segir bæjarstjóri.

Eyjar.net hefur nú þegar óskað eftir að fá glærukynningu forstjórans frá fundinum. Þær voru ekki komnar þegar þessi frétt var sett í loftið. Fleiri myndir frá fundinum má sjá hér að neðan.

https://eyjar.net/svar-an-innihalds/