​Á föstudaginn sl. héldu bæjaryfirvöld kynningarfund vegna listaverks Olafs Eliassonar sem til stendur að reisa í tilefni af 50 ára goslokaafmælis. Á fundinum komu fram nokkrar fyrirspurnir úr sal. Ein af þeim kom frá Margréti Rós Ingólfsdóttur, bæjarfulltrúa Sjálfstæðisflokksins.

Þar spurði hún um hver heildarkostnaður við framkvæmdina sé áætlaður. Páll Magnússon, forseti bæjarstjórnar svaraði fyrirspurninni í lok fundar. Í svari hans kom fram að gróf kostnaðaráætlun sé um 200 milljónir, en hversu langt fram úr þeirri tölu kostnaðurinn færi liggur ekki fyrir, en þar nefndi Páll töluna 220 milljónir. Hann benti á að í dag væri skuldbinding Vestmannaeyjabæjar 50 milljónir og skuldbinding ríkissjóðs er aðrar 50 milljónir. Það mun vera kostnaður við verkið sjálft sem rennur til listamannsins. Annar kostnaður sem þá er ófjármagnaður upp á 100 – 120 milljónir felst þá í gatnagerð og bílastæðum.

Páll benti á að innan bæjarkerfisins hafi á annan tug bókana verið bókaðar um þetta mál á undanförnum árum og hafi þær ávallt verið samþykktar með öllum greiddum atkvæðum. Fram kom hjá Páli að ekki sé reiknað með inn í þessum tölum bílastæði.

​„Kostnaður bæjarbúa af þessu eru þessar fyrrgreindar 50 milljónir plús einhver viðbót sem gæti falist í þessu bílastæði sem ekki er vitað hvað kostar en það eru ekki stórar upphæðir,” sagði Páll í lok fundarins.

Hér má horfa á upptöku frá umræddum fundi. Fleiri myndir frá fundinum má sjá hér að neðan.