Vestmannaeyjabær og HS Veitur hafa sent Vinnslustöðinni og tryggingafélagi fyrirtækisins kröfubréf þar sem farið er fram á að tjónið á vatnslögninni verði að fullu bætt en eins og staðan er í dag er áætlað heildartjón á bilinu 1.380-1.485 m.kr.

Þetta kom fram á fundi bæjaráðs Vestmannaeyja í fyrradag. Í fundargerðinni segir einnig að jafnframt sé stjórn og eigendum Vinnslustöðvarinnar aftur boðið upp á að ræða bótakröfu áður en málshöfðun fer af stað, en því var hafnað á fyrri stigum málsins.

Það er hlutverk bæjarstjórnar að reyna eftir fremsta megni að tryggja það að tjónið lendi ekki á íbúum og fyrirtækjum í Vestmannaeyjum sem notendum vatnsveitunnar.

Í niðurstöðu bæjarráðs segir að ráðið lýsi yfir vonbrigðum með að Vinnslustöðin hafi ekki viljað samtal um sanngjarnar bætur fyrir það tjón sem fyrirtækið er ábyrgt fyrir og þá stöðu sem upp er komin. Því er þetta eina leið Vestmannaeyjabæjar og HS Veitna til að fá tjónið bætt svo að það lendi ekki á notendum vatnsveitunnar í Eyjum, þ.e. íbúum og fyrirtækjum. Enn hefur félagið tækifæri til að taka samtalið.

https://eyjar.net/tjonid-haerra-en-tryggingabaetur/