Það er heldur hráslagalegt veðrið þegar blaðamaður bankaði upp á hjá Ólöfu Maren Bjarnadóttur og Páli Eiríkssyni á heimili þeirra í Foldahrauninu. Þar búa þau með tveimur börnum sínum, Ástrós Berthu og Arnóri Breka. Austan kæla og þokuslæðingur á meðan sól og blíða var annars staðar á landinu. Hún Akureyringur en hann innmúraður Eyjamaður. „Ég er að klára þriðja stig í skipstjórnarnámi sem heitir D-stig í dag og er kominn með ótakmörkuð réttindi í því bóklega en vantar tíma á sjó til að fá full réttindi nema á varðskip og allt sem því fylgir sem er í raun fjórða stigið,“ segir Páll. „Ég veit ekki hvort maður á eftir að spreyta sig á varðskipadeildinni en þar er ekki kennt nema að Landhelgisgæslan biðji um það.“ Páll hefur allan sinn sjómannsferil verið á Herjólfi og nú vantar hann tíma sem annar stýrimaður til að uppfylla öll skilyrði og það er að hafast. „Ég er búinn að vera annar stýrimaður frá því í janúar í fyrra. Þegar tilsettum tíma á sjó er náð get ég farið sem fyrsti stýrimaður og næsta skref eru skipstjóraréttindi. Það er ekki mikið eftir í fyrsta stýrimanninn og ég ætla að sækja um þegar ég verð kominn með skírteinið í hendur.“ Páll byrjaði sem háseti á Herjólfi 2019, þá 18 ára en er að verða 24 ára núna. „Mér hefur alltaf líkað vel á Herjólfi sem er gott skip. Vinnutíminn hentar mér vel. Erum viku á sjó, tökum fyrri part dags frá sex til fimm, þá kemur vikufrí og tökum svo kvöldvaktir í viku og aftur í frí. Þetta er fjölskylduvænt,“ segir Páll og Ólöf tekur undir það.

Stór vinnustaður

Herjólfur er stór vinnustaður. Á veturna eru tíu um borð og fara upp á fjórtán á sumrin. „Það er fjórföld áhöfn þannig að það eru lágmark 40 fastráðnir en geta farið upp í 56.“ Hver finnst þér helsti kosturinn við Herjólf? „Þetta er eins og ég sagði áðan, fjölskylduvænt. Þú ert ekki í burtu í marga daga og sefur heima á hverri nóttu. Þægilegur vinnutími og gott fólk sem maður vinnur með. Herjólfur gott sjóskip og fer vel með mann.“ Rekstur Herjólfs krefst margra manna með réttindi, bæði í brú og vél. Það eru þrír með skipstjórnarréttindi um borð og tveir vélstjórar. „Þannig að réttindamenn eru 18 í heildina og margir koma af f iskiskipflotanum. Finnst gott að breyta til eftir að hafa verið lengi á sjó á fiskiskipum,“ segir Páll en næst berst talið að Landeyjahöfn sem ekki hefur staðist væntingar. „Það er alltaf leiðinlegt að fara í Þorlákshöfn ekki síst fyrir farþega. Hvað er til ráða? Ég veit það ekki en eflaust eru til lausnir sem geta fjölgað dögum sem fært er í Landeyjahöfn ef menn nenna að standa í því.“ Páll segir farþega yfirleitt þakkláta en alltaf séu einhverjir sem eru það ekki. „Það er kannski mest þegar reynt er að troða sem flestum bílum um borð en við reynum eins og við getum. Ekki síst ef um síðustu ferð er að ræða,“ segir Páll.

Bikarmeistarinn Ólöf

Ólöf vann hug og hjörtu Eyjamanna þegar henni var nánast hent í markið í úrslitaleik bikarkeppninnar 2023 þar sem Eyjakonur stóðu uppi sem Bikarmeistarar eftir sigur á Val „Það var mjög óvænt og Ástrós ekki nema sjö mánaða. Ég var varamarkmaður og átti alls ekki von á að fara inn á. Svo fær Marta markmaður rautt spjald og ég varð að gera eitthvað. Var lítið búin að spila en þetta hafðist. Sem betur fer,“ segir Ólöf og hlær. Stressuð? Já. Það sést á myndum að ég var algjörlega hvít í andliti. Þetta gekk og þetta er minn fyrsti bikarmeistaratitill,“ segir Ólöf sem spilaði áður með KA/Þór á Akureyri. „Ég er enn að æfa, byrjaði aftur fyrir liðið tímabil eftir að hafa átt seinna barnið mitt þannig að þetta varð smá pása en ég hef verið í fæðingarorlofi frá því í mars í fyrra. Er í námi í sjávarútvegsfræði við Háskólann á Akureyri. Á eitt ár eftir. Það eru tvær staðarlotur á önn, fjórar á vetri og þá er gott að eiga fjölskyldu fyrir norðan.“ Páll er kominn af Þingholtsfjölskyldunni í móðurætt sem ásamt föðurfjölskyldunni er fjölmenn í Vestmannaeyjum. „Mér fannst það ekkert mál því sjálf er ég úr stórri fjölskyldu þannig að þetta er bara gaman. Er langoftast ánægð í Eyjum en ekki þegar ég þarf að fara í Þorlákshöfn. Er mjög sjóveik. Fæ alltaf koju, ligg og vonast til að æla ekki,“ segir Ólöf en hvað sér Páll framundan? „Ég verð á Herjólfi, alla vega til að byrja með en maður veit aldrei. Langar kannski að breyta til en ekki á skemmtiferðaskip, ekki strax en væri alveg til í að prófa f iskveiðar,“ segir Páll aðspurður. „Það er svo leiðinlegur vinnutími á skemmtiferðaskipunum en gæti verið gaman að prófa. Vinna í tíu vikur og frí í tíu. Valgeir, bróðir pabba hefur í tvö ár verið á skemmtiferðaskipum og líkar mjög vel. Hann er heppinn að vera á skipi sem siglir við Ísland í sumar. Fer hringinn og kemur m.a. við í Vestmannaeyjum,“ segir Páll en að endingu var Ólöf spurð um muninn á veðri á Akureyri sem bauð upp á yfir 20 stiga hita dag eftir dag þegar viðtalið var tekið. „Ég veit ekki hvort það er betra á Akureyri svona heilt yfir en vindurinn í Vestmannaeyjum er ekki beint næs. Það getur gustað á Akureyri en ekki svona mikið og er fínt á sumrin,“ voru lokaorðin að þessu sinni.