Herjólfur III gæti orðið tilbúinn til siglinga fyrir lok júlímánaðar gangi áætlanir eftir. Samkvæmt upplýsingum frá Vegagerðinni er vinna við skipið vel á veg komin.

Á mánudag er fyrirhugað að framkvæma deployment test á björgunarbúnaði skipsins. Prófið felst í því að björgunarbúnaðurinn er leystur út, eða „sprengdur út“, til að sannreyna að hann starfi rétt. Jafnframt segir Vegagerðin að dýpi í Landeyjahöfn sé gott og að stefnt sé að dýpkun innan hafnarinnar eftir um tvær vikur.

Sólveig Gísladóttir, sérfræðingur á samskiptadeild Vegagerðarinnar, segir að þeir varahlutir sem beðið hafi verið eftir séu loks komnir til birgja. Næsta skref sé fyrrnefnt deployment test, þar sem björgunarbúnaður skipsins er prófaður.

„Ef ekkert óvænt kemur upp á á lokametrunum má vænta þess að unnt verði að óska eftir haffæri á skipið og það verði tilbúið fyrir lok júlímánaðar,“ segir Sólveig.

Um stöðuna í Landeyjahöfn segir Sólveig að samkvæmt upplýsingum frá sérfræðingum á hafnadeild Vegagerðarinnar sé dýpi í og við höfnina gott um þessar mundir. Stefnt sé að því að ráðast í dýpkun innan hafnarinnar eftir um tvær vikur.