Vestmanneyska hljómsveitin Muntra var að gefa út sína fyrstu smáskífu, hið fallega færeyska lag Fagra blóma í glænýjum búning með íslenskum texta.

Lagið var tekið upp á fögrum sunnudegi 28. janúar sl. í Studió Paradís sem er staðsett í Sandgerði og var upptökustjórn í höndum Ásmundar Jóhannssonar.

Muntra er samansett af sama kjarna og fólkinu sem hefur hvíslað inn jólin í aðventunni í Vestmannaeyjum ár hvert síðan 2016.

Í tilkynningu frá hljómsveitinni segir að þau hafi viljað gera eitthvað meira en bara jólatónleika og var þá tilvalið að koma fram undir öðru nafni.

Muntra mun koma fram á Hljómey 26. apríl nk. Tónlist Muntra flokkast sem hugljúf ballöðu tónlist með þjóðlegu ívafi og áhrifum frá Færeyjum í bland við íslenska værð.

Muntra skipa:
Elísabet Guðnadóttir – söngur
Guðný Emilíana Tórshamar – söngur
Helgi R Tórzhamar – gítar
Hjálmar Carl Guðnason – bassi
Birkir Ingason – trommur
Jóhannes Guðjónsson – hammond og hljómborð.