Eyverjar hvetja Alþingismenn til að hætta að mæta bara í kaffi og halda tilgangslausa fundi og fara að girða sig í brók. Vestmannaeyjar eru stór hluti af Suðurkjördæmi og reiknum við því með að okkar atkvæði muni skipta máli í komandi alþingiskosningum. Núna er því fullkominn tími til að láta verkin tala. Okkar helsta áskorun til ykkar er að fá sjúkraþyrlu staðsetta í Vestmannaeyjum. Við erum eyja og sérstaða okkar því mikil. Hér eru oft vond veður og þegar mannslíf eru í húfi skiptir hver mínúta máli. Við finnum fyrir því að ungt fólk sem langar að flytja hingað setur það fyrir sig að hér hefur verið skorið mikið niður í heilbrigðisþjónustu og að biðtími eftir sjúkraflugi sé óásættanlegur. Óléttar konur finna fyrir óöryggi ef að eitthvað kemur upp á sem og langveikir og aldraðir sem treysta sér ekki í ferðalög til að sækja sérfræðiþjónustu. Við skorum því á ykkur að gera þetta að forgangsmáli og nýta orkuna í annað en kaffispjall og Facebook statusa.