Eyjólfur Ármannsson, innviðaráðherra og Bergþóra Þorkelsdóttir, forstjóri Vegagerðarinnar heimsóttu í dag borstæði Eyjaganga í Vestmannaeyjum ásamt fleiri fulltrúum frá innviðaráðuneytinu og Vegagerðinni.

Í færslu á vef Eyjaganga kemur fram að heimsóknin sé mikilvægur áfangi fyrir verkefnið og sýni þann áhuga og stuðning sem rannsóknir vegna fyrirhugaðra jarðganga til Vestmannaeyja njóti hjá stjórnvöldum og samgönguyfirvöldum.

Á borstæðinu fengu gestirnir kynningu á stöðu mála, tæknilegri útfærslu rannsóknanna og næstu skrefum verkefnisins. Þá fóru einnig fram umræður um framvindu verkefnisins og framtíðarsýn varðandi samgöngur til Vestmannaeyja.

Í færslunni segir jafnframt að slíkar heimsóknir séu mikilvægar fyrir framgang verkefnisins og stuðli að góðri samvinnu allra þeirra aðila sem að því koma.