ÍBV hefur ráðið Jón Ólaf Daníelsson til starfa hjá félaginu og mun samningurinn ná til 5 ára. Jón Óli mun taka við þjálfun meistaraflokks kvenna í fótbolta ásamt því að vera í þjálfarateymi Hermanns Hreiðarssonar í meistaraflokki karla. Þá hefur unglingaráð ÍBV einnig gert samning við Jón Óla um yfirþjálfun yngri flokka félagsins í fótbolta.

Jón Óli er öllum hnútum kunnugur hjá félaginu en hann þjálfaði mfl. kvk 2007-2014 og svo aftur 2019 ásamt því að hafa verið yfirþjálfari félagsins, segir í frétt á heimasíðu félagsins þar sem Jón Óli er boðinn velkominn til starfa og honum óskað velfarnaðar í starfi.