Haustið 2021 auglýsti Vestmannaeyjabær eftir tillögum að uppbyggingu aðstöðu til sjósunds í Klaufinni/Höfðavík. Arkítektafyrirtækið Undra ehf., var eina fyrirtækið sem sendi inn tillögu. Málið far til umræðu á fundi bæjarstjórnar á fimmtudag.

Um er að ræða tillögu um sjávarbaðstað með aðstöðu til sjósunds og útivistar við Klaufina/Höfðavík í Vestmannaeyjum. Sjávarbaðstaðan mun falla að nærumhverfi og verða í nánum tengslum við náttúru Vestmannaeyja. Markmið tillögunnar er að skapa skemmtilegan áfangastað fyrir bæjarbúa og gesti til útivistar og til að stunda sjóböð. Hugmyndin er að sjávarbaðið og aðstaðan fyrir sjósund verði hluti af gönguleið sem er ætlað að tengja saman helstu sögu- og útsýnisstaði í Vestmannaeyjum. Gert er ráð fyrir að sjávarbaðstaðan verði með laugum á tveimur pöllum (kaldur og heitur pottur), útsýnisstað, sturtu- og búningaaðstöðu og mögulega saunu. Vatnið í laugunum verði upphitaður sjór.

Á fundi sínum þann 28. febrúar sl., ákvað umhverfis- og skipulagsráð að vísa málinu til afgreiðslu bæjarstjórnar.

Bæjarstjórn leggur til við umhverfis- og framkvæmdasvið að kannaður verði áhugi einkaaðila um sjósundsaðstöðu samkvæmt innsendri tillögu frá Undra ehf.

Bæjarstjórn vísar aðal- og deiliskipulagsvinnu til fjárhagsáætlunargerðar fyrir árið 2023. Þegar kemur að þeirri vinnu í haust þarf að taka ákvörðun um framkvæmdina sjálfa og ákveða hvort eða hvernig skuli skipta verkinu niður verði farið af stað í framkvæmdina.

Tillagan var samþykkt samhljóða með sjö atkvæðum bæjarfulltrúa.

Minnisblað – Skipulagsmál, sjósundsaðstaða við Klaufina.pdf