ÍBV og KA mættust á Akureyri í dag í lokaleik sjöttu umferðar Bestu deildar karla. Leiknum lauk með 2-0 sigri heimamanna. 

KA menn komust yfir á 17. mínútu leiksins með marki frá Hallgrími Mar Steingrímssyni. Markvörður Eyjamanna, Ari i Haraldstovu Petersen, hljóp þá út í markinu til hreinsa boltann. Boltinn datt fyrir Hallgrím Mar sem skoraði í autt markið af löngu færi og kom KA í 1-0.

Seinni hálfleikurinn bauð ekki upp á mikið og lítið um dauðafæri. Eyjamenn reyndu að sækja og sækja en lítið gekk upp. KA menn tvöfölduðu forystu sína á lokamínútu leiksins þegar það kom fyrirgjöf á nær og Felix Örn Friðriksson setti boltinn í eigið mark. Lokatölur leiksins 2-0.

Eyjamenn eru eftir sex umferðir með eitt stig í neðsta sæti deildarinnar. KA menn voru að vinna sinn annan leik í röð og eru með sjö stig í sjötta sæti.

Næsti leikur ÍBV er gegn Víkingi Reykjavík á Hásteinsvelli, sunnudaginn 17. maí kl. 16:00.

KA 2 – 0 ÍBV

1-0 Hallgrímur Mar Steingrímsson (’17)

2-0 Felix Örn Friðriksson (’90, sjálfsmark)