Undirbúningi fyrir næstu rannsóknarholu Eyjaganga á Landeyjasandi er nú lokið og stendur til að hefja bæði fóðrun og kjarnaborun á næstu dögum. Þetta kemur fram í nýrri frétt á vef Eyjaganga.

Rannsóknarholan, sem ber heitið EG-02, er hluti af umfangsmiklum jarðfræðirannsóknum sem ætlað er að varpa ljósi á hvort raunhæft sé að ráðast í gerð jarðganga milli lands og Vestmannaeyja.

Fyrst sett niður 40 metra löng fóðrun

Vegna aðstæðna á Landeyjasandi, þar sem efstu jarðlögin eru að mestu laus sandur, verður fyrsta skrefið að setja niður um 40 metra langa fóðrun sem á að tryggja stöðugleika borholunnar áður en borað verður dýpra niður í berggrunninn.

Að því loknu tekur við sjálf kjarnaborunin, en gert er ráð fyrir að holan verði boruð niður á allt að 300 metra dýpi.

Mikilvæg gögn fyrir mat á göngum

Markmið borunarinnar er að ná upp samfelldum kjarnasýnum úr jarðlögunum undir sandinum. Slík sýni gefa vísindamönnum og verkfræðingum mikilvægar upplýsingar um gerð, styrk og eiginleika berglaganna á svæðinu. Fram kemur að slíkar rannsóknir séu lykilforsenda þess að hægt sé að meta fýsileika jarðgangagerðar, hanna örugg göng og áætla kostnað við verkefnið.

Í fréttinni er haft eftir Haraldi Pálssyni, framkvæmdastjóra Eyjaganga, að sérstakt sé að sjá kjarnaborinn Karl Prins kominn á sinn stað á Landeyjasandi með Vestmannaeyjar í bakgrunni.

„Með því að bora niður á 300 metra dýpi fáum við áður óþekkt gögn um jarðlögin á þessu svæði, sem færir okkur nær raunhæfu mati á jarðgöngum til Eyja,“ segir Haraldur.

Gangaopið líklega ofar í landinu

Þótt talið sé líklegt að mögulegt gangaop á Landeyjasandi yrði staðsett ofar í landi telja forsvarsmenn verkefnisins mikilvægt að taka kjarnasýni sem næst strandlínunni. Þannig megi fá sem gleggsta mynd af jarðlögum á þeirri leið sem hugsanleg göng myndu liggja.