Kjörsókn í sveitarstjórnarkosningunum í Vestmannaeyjum reyndist minni en í síðustu bæjarstjórnarkosningum. Samkvæmt lokatölum greiddu 2.649 atkvæði af 3.538 á kjörskrá, sem jafngildir 74,9% kjörsókn.

Til samanburðar var kjörsókn í bæjarstjórnarkosningunum árið 2022, 80,9%, árið 2018, 83,2% og árið 2014, 74,7%.​ Munurinn frá kosningunum árið 2022 nemur um ​​sex prósentustigum, en kjörsóknin nú er þó svipuð og hún var árið 2014. Síðustu sveitarstjórnarkosningar hafa almennt einkennst af kjörsókn yfir 80%, en nú fór hún niður fyrir 75% í fyrsta sinn síðan árið 2014.

Þá má geta þess að kjörsóknin um síðustu helgi var mun meiri í öllum sveitarfélögunum á höfuðborgarsvæðinu en í kosningunum fyrir fjórum árum. Sama gildir um nokkur stærstu sveitarfélögin á landsbyggðinni.

​​Eitt sem vekur athygli er að kjósendum ​í​ Eyjum hefur fjölgað töluvert frá síðustu sveitarstjórnarkosningum. Nú voru 3.538 á kjörskrá, samanborið við 3.284 árið 2022, sem er fjölgun um 254 kjósendur, eða ríflega 7,7%.

Fáar útstrikanir 

Yfirkjörstjórn Vestmannaeyja hefur nú lokið yfirferð sinni yfir breytta atkvæðaseðla og sent kosningaskýrslu og yfirlýsingu um úrslit til Landskjörstjórnar. Niðurstaðan staðfestir áður birt úrslit kosninganna.

Yfirferðin sýnir að breytingar kjósenda á listum höfðu ekki áhrif á niðurstöðuna. Á D-lista fékk oddvitinn Eyþór Harðarson 23 útstrikanir, Trausti Hjaltason 43 og Hildur Sólveig Sigurðardóttir 25. Á E-lista fékk Arndís María Kjartansdóttir 18 útstrikanir og Anton Örn Björnsson 10. Á M-lista voru útstrikanir enn færri, þar sem Jón Þór Guðjónsson fékk tvær og Sæunn Magnúsdóttir eina.