Karlakór Vestmannaeyja býður alla karlmenn velkomna í kjötsúpuveislu í Akógessalnum annaðkvöld, miðvikudag 18. september klukkan 20:00. Kjötsúpukvöld KKVE er kjörið tækifærið til að kynna sér starf kórsins og ganga til liðs við einn skemmtilegasta félagsskap sem hugsast getur. Við viljum endilega sjá sem flest ný andlit og hvetjum við karlmenn á öllum aldri til að láta sjá sig og draga jafnvel einn eða tvo félaga með sér til stuðnings.

Við erum alltaf að leita að góðum mönnum og stefnum við að ölfugu starfi í vetur. Það stendur mikið til í vetur þar sem endurreysn kórsins fagnar 10 ára afmæli. Fyrirhuguð er í vor fyrsta ferð kórsins út fyrir landsteinana. Í boði verður geggjuð kjötsúpa, enn betri félagskapur, “léttar veitingar” og söngur! Hvað er hægt að biðja um meira á fallegu haustkvöldi?

Hvað segja meðlimir um kórstarfið: „Þetta er svo frábært. Enginn ætti að yfirgefa þessa jarðvist án þess að hafa allavega prófað að vera í kór,“ segir Jarl Sigurgeirsson, skólastjóri Tónlistaskóla Vestmannaeyja.

„Við erum ekki að þessu afþví okkur sárvantar mannskap. Okkur finnst bara ósangjarnt að aðrir missi af þessu,” segir Sindri Ólafsson formaður stjórnar Karlakórs Vestmannaeyja.

„Frá því að ég var krakki hefur mér alltaf fundist gaman að syngja og að syngja í kór með hópi af hressum körlum er mjög upplífgandi og skemmtilegt hobbí. Það er nauðsynlegt að eiga gott hobbí,“ segir Andri Hugó Runólfsson raddformaður í 2. bassa.