Sprenghlægilegur verðlaunasöngleikur 

Spamalot er mjög húmorískur verðlaunasöngleikur eftir Eric Idle, einn af meðlimum Monty Python gengisins. Spamalot hlaut meðal annars 14 Tony verðlauna tilnefningar og vann þrjár þeirra árið 2005. Monty Python er félagsskapur nokkurra bestu grínista Bretlands fyrr og síðar og hafa þeir félagar framleitt absúrd aulabrandara í bland við pólitískt, samfélagslegt og trúarlega beitt grín í marga áratugi.  

Spamalot stelur mjög bókstaflega söguþræði einnar fyndnustu myndar þeirra félaga, „Monty Python and the Holy Grail“ og kryddar með stórkostlegri músík og lögum í bland við ýmsa brandara sem sóttir eru í smiðju Python félaga. Þar má meðal annars finna lagið „Always look on the bright side of LIFE“ úr annarri óborganlegri mynd Monty Python, „Life of Brian“.  

Í Spamalot fylgjumst við með sögunni af Artúr konungi og baráttu hans við að fá virðingu og viðurkenningu sem konungur Bretlands. Eftir að Vatnadís birtist honum og færir honum sverðið Excalibur (sem gerir hann að konungi Englands) leggur Artúr í heilaga sendiför til að finna riddara sér við hlið til að verða hluti af hirð hans við Kamelot kastala, riddara hringborðsins. Í leit sinni verða margvíslegar hindranir á vegi hans og riddara hans, svo sem mykjubændur með pólitískar meiningar, ruddalegir frakkar, riddararnir sem segja NÍ og drápsóð kanína. Honum til aðstoðar á ferð hans er hans trausti reiðskjóti Blóri, en hann er ekki hestur heldur maður sem ferðast um með tvær kókoshnetur og lemur þeim saman til að mynda hófatak.  

Söngleikurinn Spamalot er sprenghlægilegur og stútfullur af snilldarmúsík og hefur slegið í gegn um allan heim. 

Stefán Benedikt Vilhelmsson

Stefán Benedikt Vilhelmsson leikstýrir verkinu Spamalot. Stefán er 43 ára og giftur leikkonunni Andreu Ösp Karlsdóttur. Á hann tvö börn með þremur konum, þær Emblu Steinvör 14 ára og Iðunni Eldey 9 ára.

Stefán lék sjálfur í sínu fyrsta leikriti utan skóla þegar hann var 12 ára gamall þegar Leikfélag Fljótsdalshéraðs setti upp Kardemommubæinn. ” Ég fékk að fljúga í blöðrum á sviðinu sem mér þótti ekki lítið gaman.” Hann útskrifaðist með BFA gráðu af leikarabraut Listaháskóla Íslands og frá útskrift hefur hann unnið að mestu með sjálfstæðum leikhópum og þá langmest með leikhópnum Lottu sem er aðal vinna hans enþá. Hann talsetur einnig mikið af teiknimyndum og þáttum hjá bæði Stúdíó Sýrland og Myndform. 
Spamalot er um fimmtánda verkið sem hann leikstýrir og þriðja verkið sem hann leikstýrir hjá Leikfélagi Vestmannaeyja. “Ég er leikstjóri aðallega. En ég hanna svo leikmynd ásamt Valgerði Elínu og geri bara það sem þarf. Ég reyni að vera eitthvað með puttana inni í vinnu í öllum deildum þegar ég leikstýri.”

Hvernig gengur undirbúningur fyrir Spamalot? Hann gengur mjög vel. Ég er að vinna með fullt af æðislegu fólki, duglegu fólki. Til að búa til gott leikhús þarf mikla vinnu og fólk sem er tilbúið að leggja hana á sig. Og Leikfélag Vestmannaeyja er ríkt að eiga nákvæmlega svona fólk. Svo er aðstaðan frábær og hægt að vera með sviðið undir hönnun og smíðar á leikmynd frá fyrsta degi án þess að annað þurfi að nýta sviðið. Þetta gefur mikla möguleika til að vinna skemmtilega og svolítið flókna hluti (sem mér leiðist ekki neitt) og kannski stærri hluti en hægt er að gera allsstaðar.  
Hvernig finnst þér að koma til Vestmannaeyja að leikstýra verki? Það eru forréttindi að fá að vinna hérna með öllu duglega, skemmtilega og hæfileikaríka fólkinu sem Leikfélag Vestmannaeyja á. Hér er frábær aðstaða og magnað að vera í þessu fallega umhverfi. Vestmannaeyjar eiga orðið sinn part af hjarta mínu og það er alltaf gaman að leikstýra hérna. Og áskorun að nýta alla þessa aðstöðu og fólk til hins ýtrasta og gera geggjaða sviðslist!  
Hvernig myndir þú lýsa Spamalot ? Spamalot er sprenghlægilegur verðlaunasöngleikur með dásamlega vitlausum og absúrd bröndurum og skemmtilegri tónlist.  
Eitthvað að lokum? Eins og Blóri okkar segir: Líttu alltaf á lífsins björtustu hlið (always look on the bright side of life).