Handboltamennirnir Andrés Marel Sigurðsson, Egill Oddgeir Stefánsson og Hákon Daði Styrmisson eru allir á förum frá ÍBV. Þá hefur Nökkvi Snær Óðinsson lagt skóna á hilluna. Félagið greindi frá brotthvarfi leikmannanna á samfélagsmiðlum sínum. 

Andrés Marel hefur ákveðið að færa sig yfir á nýjan vettvang þar sem hann mun hefja nám í bænum eftir sumarið og verður því ekki með liðinu á komandi tímabili. 

Egill Oddgeir Stefánsson flytur einnig frá Eyjum eftir sumarið til að hefja nám. Hann hefur skrifað undir samning við Gróttu sem leikur í Grill 66 deildinni og mun leika með þeim næstu tvö árin. Egill lék með HBH í vetur þar sem hann skoraði 88 mörk ásamt því að leika með ÍBV.

Hákon Daði Styrmisson kom til ÍBV eftir áramót, eftir að hafa verið í atvinnumennsku. Hann hefur nú samið við Aftureldingu um að leika með liðinu næstu þrjú árin í Olís deild karla. 

Nökkvi Snær Óðinsson hefur svo ákveðið að leggja skóna á hilluna eftir farsælan feril með ÍBV. Í tilkynningu ÍBV segir: ,,í gegnum árin hefur hann verið dýrmætur hluti af félaginu og lagt sitt af mörkum með dugnaði, metnaði og góðum karakter. Einnig var Nökkvi lykilmaður hjá okkur í Íslandsmeistaratitli 2023. Framlag hans til félagsins verður seint fullþakkað.”

Á facebook-síðu félagsins þakkar ÍBV þeim öllum fyrir þeirra framlag til félagsins og óskar þeim leikmönnum sem sigla nú á önnur mið velfarnaðar í nýjum verkefnum.