Loðnuleiðangri átta skipa lokið og útreikningar standa yfir. Nokkur norsk skip hafa hafið veiðar og fleiri á leiðinni á miðin. Birkir Bárðarson leiðangursstjóri segir, í samtali við vef fiskifrétta, það hafa verið nokkuð krefjandi að mæla loðnuna í vetur. Niðurstöður útreikninga verði vonandi tilbúnar fyrir helgi.

Enn eru engar niðurstöður komnar úr nýjasta loðnuleiðangri Hafrannsóknastofnunar en Birkir Bárðarson leiðangursstjóri segist gera sér vonir um að með þessum leiðangri hafi tekist að fá heildarmynd af stöðunni. Ekki ætti þá að þurfa að fara aftur í frekari leit.

Hann kaus að tjá sig ekkert um magnið að svo stöddu, en gat þó upplýst að loðnan hafi verið víða með landgrunnsbrúnum, bæði fyrir austan og vestan land.

„Fyrir vestan var það mest ungloðna sem verður þá efniviður í næstu vertíð. Kynþroska loðnan virtist vera gengin af því svæði að mestu en austan til var þetta aðallega kynþroska loðna og hún var í langmestu magni syðst út af Austfjörðunum. Þar var hún farin að ganga upp á grunninn.“

Krefjandi að mæla stofninn
Eftir loðnubrest tvö ár í röð er nú búið að leyfa veiði, alls um 61 þúsund tonn og margir gera sér vonir um að niðurstöður úr þessum leiðangri muni skila sér í mun hærri ráðgjöf.

„Þetta er búið að vera mjög krefjandi að ná að mæla stofninn núna,“ segir Birkir. „Það var nú ekkert sérstaklega gott veður alltaf. Bjarni Sæmundsson lenti í vandræðum með ísingu og skipin þarna nyrst, en við komumst í gegnum þetta.“

Spurður hvort erfitt hefði orðið að ná nógu góðri mælingu í ár til að geta gefið út ráðgjöf ef ekki verið hægt að fara í þessa aukaleiðangra með viðbótarfjármagni, segir hann að vissulega hafi þar munað mikið um.

„Þetta gæti hafa orðið erfitt ef við hefðum nálgast þetta öðru vísi. Það skipti líka miklu máli að bregðast við. Það var verðmætt að ná þessari mælingu í desember til dæmis, og svo þurftum við að stökkva til þegar við fréttum af loðnu fyrir austan land og það var mikilvægt að ná því fljótt. Við sjáum að það geta komið upp aðstæður þar sem við þurfum að geta nálgast þetta svona.“

Alls héldu átta skip á vegum Hafrannsóknastofnunar í loðnumælingar og loðnuleit í síðustu viku, og hafa aldrei verið fleiri. Þetta var þriðji leiðangurinn á árinu og sá fjórði í vetur.

Fyrstu loðnunni landað
Hér á landi var fyrsta loðnufarminum landað á Eskifirði síðasta laugardag þegar grænlenska skipið Polar Amaroq kom með tæplega 700 tonn af frystri loðnu til Síldarvinnslunnar hf.

„Loðnan sem veiddist var hin fallegasta og voru um það bil 40 stk. í kílóinu. Nokkur áta var í loðnunni,“ sagði á vef Síldarvinnslunnar.

Á annan tug norskra skipa voru í gær ýmist komin hingað til lands til veiða eða á leiðinni. Eitt þeirra, Vendla, var á heimleið til Noregs með 435 tonn af loðnu. Norska Fiskeribladet segir frá því að Vendla fái 9,61 norska krónur fyrir kílóið, eða 4,2 milljónir fyrir aflann. Þetta mun vera metverð og samsvarar um 144 íslenskum krónum fyrir kílóið og 63 milljónir fyrir aflann.

fiskifréttir.is