Í loðnuleitarleiðöngrum stofnunarinnar í janúar og febrúar mældist ekki nærri nógu mikil loðna til að hægt væri að gefa út ráðgjöf um veiðar. Engar breytingar virðast ætla að verða á því. Vonir bundnar við góða ungloðnumælingu síðasta haust.

Birkir Bárðarson, fiskifræðingur á Hafrannsóknastofnun og leiðangursstjóri loðnuleitar stofnunarinnar, segir að nú sé verið að vinna úr þeim upplýsingum sem safnast hafa og lokaniðurstöður verði birtar á næstu dögum.

Farið var aukalega í yfirferð inn á firði fyrir norðan land og þar hafi víða sést loðna komin nálægt hrygningu, en ekki í neinu umtalsverðu magni.

„Við vorum heilt yfir ekki að sjá neitt rosalegt magn, en það er erfitt að halda utan um það á þessum tíma þegar hún er komin á grunnt og komin nálægt hrygningu.“

Ekki er búið að reikna endanlega út magnið sem þar mældist.

„Þetta var þó ekkert rosalegt magn heilt á litið. Þó var eitthvað líf inni á fjörðum við Húnaflóa og víðar. Hún átti víða stutt eftir í hrygningu og heilt yfir virðist hún vera aðeins seinna á ferðinni fyrir norðan en fyrir sunnar.“

Loðnutorfur á stangli fyrir vestan

Á síðustu dögum hafa borist fréttir af því, frá sjómönnum á Breiðafirði, að loðna væri í í fiski sem veiddist út af Vestfjörðum, svo mikil að hann sé hættur að taka línuna. Þetta vekur upp spurningar hvort hefðbundin vestanganga sé komin til landsins.

Birkir segir þó ekki nein áform vera uppi um frekari leiðangra af því tilefni.

„Nei, þegar við fórum þarna um sáum við einhverjar loðnutorfur á stangli og það sem við tókum sýni úr var mikið til karl og hrygnd loðna. Við höfum ekki í kortunum neina fyrirhugaða leiðangra í viðbót í þá veru.“

Í loðnuleitarleiðöngrum stofnunarinnar í janúar og febrúar mældist ekki nærri nógu mikil loðna til að hægt væri að gefa út ráðgjöf um veiðar. Engar breytingar virðast ætla að verða á því. Loðnubrestur annað árið í röð kæmi þungt niður á fyrirtækjum og sveitarfélögum sem þar á ofan eru að fara í djúpa dýfu vegna heimsfaraldur COVID-19.

Margt áhugavert

Birkir segir engu að síður að margt áhugavert hafi komið í ljós í þessum síðasta leiðangri fyrir norðan land.

„Við höfum ekki verið að skoða þetta á þessum tíma áður. Það var áhugavert að sjá hvað hún er víða þarna, þó við höfum ekki séð neitt rosalegt magn neins staðar, en það líka vakna alls konar spurningar. Til dæmis væri fróðlegt fyrir okkur að fræðast betur um það hvaða gönguleiðir hún er að fara þarna fyrir norðan, og hvernig hún er að haga sér þegar hún gengur upp á grunnið fyrir norðan. Þetta er allt ágætlega þekkt fyrir sunnan og vestan land byggt á veiðum undanfarinna ára og áratuga, en fyrir norðan höfum við ekki eins góðar upplýsingar um það hvernig hún hagar sér það. Það vakna til dæmis spurningar um það hvaða leið loðna sem finnst í Húnaflóa kom þangað.“

Eftir sem áður eru nokkuð góðar horfur fyrir vertíðina á næsta ári.

„Já, það var góð ungloðnumæling síðasta haust, eitthvað um 82-83 milljarðar af ungloðnu sem mældust í síðustu haustmælingu. Það nægði þá þegar til ráðgjafar upp á 170 þúsund tonna veiði á næstu vertíð. Það lofar góðu miðað við síðustu tvö fiskveiðiár, þannig að það er jákvætt og verður fróðlegt að sjá hvernig það birtist okkur.“

fiskifréttir.is