ÍBV tekur á móti ÍA á Hásteinsvelli í dag í 19. umferð Bestu deildar karla. Flautað verður til leiks klukkan 18:00 og eru mikilvæg stig í húfi fyrir Eyjamenn í þéttri baráttu í neðri hluta deildarinnar.

ÍBV situr í 9. sæti deildarinnar með 17 stig eftir 18 leiki. FH er sæti neðar með jafnmörg stig en KA og Þór eru þar fyrir neðan með 15 stig. Baráttan á neðri hluta töflunnar er því afar þétt.

ÍA er í 7. sæti með 22 stig, fimm stigum á undan ÍBV. Sigur í dag myndi því ekki aðeins gefa Eyjamönnum mikilvægt forskot í baráttunni fyrir neðan heldur jafnframt minnka bilið í ÍA niður í aðeins tvö stig.

ÍBV kemur inn í leikinn eftir 2-2 jafntefli gegn toppliði Víkings á útivelli í síðustu umferð. Eyjamenn hafa hins vegar ekki unnið í síðustu fimm deildarleikjum og því væri sigur á heimavelli kærkominn.

ÍA vann sinn síðasta leik og er með 22 stig, líkt og Valur. Stjarnan er skammt undan með 21 stig og því eru aðeins fimm stig frá ÍBV í 9. sæti upp í Val og ÍA í 6. og 7. sæti.

Þrír leikir fara fram á sama tíma klukkan 18:00 á sunnudag. Auk leiks ÍBV og ÍA tekur KR á móti Breiðablik á Meistaravöllum og FH fær topplið Víkings í heimsókn í Kaplakrika. Sá leikur skiptir Eyjamenn ekki síður máli enda eru ÍBV og FH jöfn að stigum fyrir umferðina.