Kvennalið ÍBV styrkti stöðu sína í efri hluta Bestu deildar kvenna þegar þær unnu 1-3 sigur gegn Víkingi Reykjavík í 10. umferð deildarinnar í Víkinni í kvöld. Var þetta fyrsti sigur ÍBV í deildinni í tvo mánuði. 

Allison Grace Lowrey kom Eyjakonum á bragðið strax á 8. mínútu leiksins þegar hún skoraði eftir undirbúning Viktoriju Zaicikovu. Skot Allison fór af varnarmanni Víkings, Áslaugu Dóru Sigurbjörnsdóttur, og í netið. Víkingskonur jöfnuðu leikinn á 24. mínútu með frábæru marki frá Örnu Ísold Stefánsdóttur.

Olga Sevcova sá til þess að Eyjakonur færu með forystu inn í hálfleikinn þegar hún skoraði með hnitmiðuðu skoti úr teignum eftir sendingu Allison Lowrey. Staðan 1-2 í hálfleik. 

Víkingskonur sóttu og sóttu í síðari hálfleik í leit að jöfnunarmarki en inn vildi boltinn ekki. Allison Patricia Clark tvöfaldaði forystu ÍBV þegar um 20 mínútur voru til leiksloka með frábæru skoti fyrir utan teig.

Víkingskonur fengu færi til að minnka muninn en færanýting þeirra ekki upp á marga fiska í kvöld. Auk þess sem markvörður ÍBV, Arden Joy La-Rose, átti góðan leik milli stanganna. Lokatölur leiksins 1-3 og Eyjakonur eru komnar aftur á sigurbraut í deildinni.

ÍBV situr í fjórða sæti deildarinnar með 17 stig. Víkingur er í sjöunda sæti með 10 stig.

Víkingur R. 1 – 3 ÍBV
0-1 Allison Grace Lowrey (‘8 )
1-1 Arna Ísold Stefánsdóttir (’24 )
1-2 Olga Sevcova (’37 )
1-3 Allison Patricia Clark (’72 )