Á morgun, sunnudag kl. 13:00 í Náttúrugripasafninu við Heiðarveg opnar Njáll Ragnarsson formaður bæjarráðs sýningu á munum safnsins, fugla- og steinasafni. Hörður Baldvinsson, safnstjóri fjallar um sögu safnsins. Djúpið opnar sýninguna Fast þeir sóttu sjóinn.
„Ég kom með þessa tillögu því mér fannst þetta einfaldara, að vera hér á gamla staðnum í staðinn fyrir að rífa upp fuglana og steinana og setja í kassa og koma þeim fyrir einhverstaðar úti í bæ við misjöfn skilyrði,“ segir Hörður sem hefur undanfarið unnið hörðum höndum ásamt fleira góðu fólki við að laga til á safninu og þrífa.
„Hér hefur safnið verið allt frá 1964 og er góð lausn því við erum ekki klár með byggingu undir hvorki steina- né fuglasafnið,“ bætti Hörður við og vonast til að sjá sem flesta við opnunina.