Karlaliði ÍBV hefur borist góður liðsauki en félagið hefur samið við slóvenska landsliðsmanninn Matjaz Mlakar. Í tilkynningu frá ÍBV er hann sagður línutröll, enda 190 sm á hæð og „100 kg af massa“. Mlakar er sterkur leikmaður sem hefur leikið með mjög sterkum liðum, m.a. Celje Lasko, Gorenje Velenje og RK Cimos Koper þar sem hann varð evrópumeistari félagsliða. Hann kemur frá Slóvenska liðinu RK Maribor Branik en Branik komst alla leið í undanúrslit EHF bikarsins á síðastliðnu tímabili.