Sigurður Ingi Jóhannsson innviðaráðherra og Bergþóra Þorkelsdóttir forstjóri Vegagerðarinnar hafa samþykkt að sitja íbúafund í Vestmannaeyjum þar sem samgöngumálin verða á dagskrá. Þetta kemur fram í Morgunblaðinu í gær þar sem rætt er við Írisi Róbertsdóttur bæjarstjóra. „Mér var falið að óska eftir því að innviðaráðherra, vegamálastjóri og aðrir fulltrúar Vegagerðarinnar myndu koma á íbúafund í Eyjum. Það hefur nú verið ákveðið og fundurinn verður 30. janúar í Höllinni,“ sagði Íris í samtali við Morgunblaðið. Hún sagði stöðuna í vetur hafa verið óásættanlega og kallar eftir áætlunum um samgöngur yfir vetrartímann sem hafi verið mjög erfiðar. „Þessar skertu samgöngur hafa mikil áhrif á allt samfélagið, bæði íbúa og atvinnurekstur, að fara úr sjö ferðum í tvær, og mun lengri sjóleið er eitthvað sem við getum illa sætt okkur við. Eðlilega er komin þreyta í okkur öll hér í Eyjum að þetta skuli ekki ganga betur en nú er og það þarf einfaldlega að bæta þessa höfn ef hún á að vera okkar heils árs samgöngumáti, sem hún er því miður ekki í dag. Við erum að kalla eftir svörum við því,“ sagði Íris við Morgunblaðið