Fulltrúar bæjarráðs Vestmannaeyja funduðu með Eyjólfi Ármannssyni, innviðaráðherra, í ráðuneytinu þann 6. nóvember síðastliðinn. Á fundinum var farið yfir helstu hagsmunamál Vestmannaeyja, þar á meðal fyrirhugaða lagningu nýrrar vatnslagnar, stöðu Landeyjahafnar, hafnarmál og framhald rannsókna á mögulegum jarðgöngum milli lands og Eyja.

Kalla eftir fullri fjármögnun nýrrar almannavarnarlagnar

Bæjarráð upplýsti ráðherra um stöðu mála varðandi nýja vatnslögn, NSL4, svokallaða almannavarnarlögn, sem áætlað er að verði lögð sumarið 2026. Heildarkostnaður framkvæmdarinnar er metinn á um 3 milljarða króna.

Engar tekjur fylgja framkvæmdinni fyrir Vestmannaeyjabæ og því, að óbreyttu, myndi kostnaðurinn lenda alfarið á sveitarfélaginu og þar með íbúum. Lögðu fulltrúar bæjarins þunga áherslu á að ríkið komi að verkefninu með mun meira fjármagni en nú hefur verið boðað, enda sé ábyrgð sveitarfélags á sérstakri almannavarnarlögn hvorki eðlileg né sambærileg við önnur sveitarfélög á Íslandi.

Í dag liggur fyrir viljayfirlýsing um 800 milljóna króna framlag ríkisins, en hún var undirrituð áður en tjón varð á eldri lögn, NSL3. Óljós staða um framhaldið skapar einnig óvissu við gerð fjárhagsáætlunar Vestmannaeyja fyrir næstu ár.

Landeyjahöfn enn ekki heilsárshöfn eftir 15 ár

Samgöngumál voru einnig stór þáttur fundarins. Farið var yfir stöðu dýpkunar í Landeyjahöfn og væntanlegt útboð, sem fulltrúar Vestmannaeyja sögðu mikilvægt að fjármagna nægilega til að tryggja að verkið verði unnið á tæknilega háu stigi.

Áréttað var að Landeyjahöfn, sem formlega opnaði árið 2010, sé enn ekki tilbúin sem heilsárshöfn og að nauðsynlegt sé að ríkið bregðist við þeim vanda sem viðvarandi dýpkunarþörf veldur.

Fram kom að Hafnabótasjóður, sem veitir mótframlög í hafnarframkvæmdir, hefur verið skertur um 30%, sem hamlar framvindu mikilvægra verkefna bæði í Vestmannaeyjum og víðar um land.

60 milljónir brýnar til að hefja jarðgangarannsóknir

Í framhaldi af vinnu starfshóps á vegum innviðaráðherra, sem skilaði niðurstöðum sínum fyrir ári, ítrekaði bæjarráð mikilvægi þess að tryggja 60 milljóna króna fjármagn strax á haustmánuðum í fyrsta áfanga þrepaskiptra rannsókna á jarðlögum milli lands og Eyja.

Rannsóknirnar eru nauðsynlegar til að leggja mat á kostnað og framkvæmd framtíðarsamgangna, þar með talið möguleg jarðgöng. Með framlagi nú í vetur mætti hefja rannsóknarferlið á næsta ári og þannig skapa grundvöll fyrir ákvörðun um framtíðarsamgöngur við Vestmannaeyjar.