Róbert Aron Hostert, handknattleiksmaðurinn snjalli sem varð Íslandsmeistari með Fram í vor, gekk í dag til liðs við nýliða ÍBV og skrifaði undir eins árs samning við félagið. „Ég tel að ÍBV sé fullkominn staður til þess að fá tækifæri til þess að þróa mig sem miðjumann í deild sem ég þekki og auðveldar það mér að aðlagast nýju hlutverki inni á vellinum. ÍBV býður mér upp á flotta aðstöðu og góða þjálfara sem ég er mjög spenntur fyrir að vinna með,“ sagði Róbert Aron við mbl.is en hann stefnir á að halda út í atvinnumennsku á næsta ári en mörg erlend lið hafa borið víurnar í leikmanninn snjalla, sem hefur spilað allan sinn feril með Fram.