Umgjörð og reglur fyrir verkefnið “Viltu hafa áhrif“ hefur verið tekið til endurskoðunar hjá bæjaryfirvöldum. Ástæða þess er að sjóðurinn hefur þróast og breyst frá upphaflegum markmiðum í gegnum árin. Þetta kemur fram í fundargerð bæjarráðs.

Þar er einnig greint frá því að Drífa Gunnarsdóttir, framkvæmdastjóri stjórnsýslu- og fjármálasviðs hafi farið yfir verkefnin sem hafa verið styrkt undanfarin ár. Allt eru þetta fjölbreytt og áhugaverð verkefni en ná yfir vítt svið, s.s menningu, listir, íþróttir og tómstundir. Sjóðurinn þyrfti að skilgreina betur hvers konar verkefni eru styrkt. Ekki er um að ræða aukið fjármagn eða nýjan sjóð heldur breytingu á formi.

Bæjarráð samþykkti samhljóða að gera breytingar með því að setja á fót menningar- og listasjóð sem bæjarráð fer með og skoða tilfærslu á fjármagni fyrir verkefni tengd íþróttum- og tómstundum sem fjölskyldu- og tómstundaráð mun úthluta. Vinna þarf drög að reglum og leggja fyrir bæjarráð á næsta fundi.