Herjólfur ohf. hefur birt nýja tilkynningu um siglingaráætlun næstu daga. Samkvæmt henni verður siglt sex ferðir til Landeyjahafnar á morgun, fimmtudaginn 14. maí.

Brottfarir frá Vestmannaeyjum verða klukkan 07:00, 09:30, 12:00, 14:30, 17:00 og 19:30. Frá Landeyjahöfn verður siglt klukkan 08:15, 10:45, 13:15, 15:45, 18:15 og 20:45.

Á föstudag hefur áætlun aðeins verið gefin út fyrir fyrri hluta dags að svo stöddu. Þá verður brottför frá Vestmannaeyjum klukkan 07:00 og 09:30, en frá Landeyjahöfn klukkan 08:15 og 10:45. Nánari upplýsingar um siglingar síðar á föstudeginum verða birtar á föstudagsmorgun.

Þá segir í tilkynningu Herjólfs að enn sé unnið að því að færa gagnagrunn bókunarkerfis félagsins yfir. Farþegar geta bókað ferðir með því að hafa samband við skrifstofu Herjólfs í síma 481-2800.