Setning Þjóðhátíðar fór fram í blíðskaparveðri í Herjólfsdal í gær.  Við setningu Þjóðhátíðar blessaði Guðrún Karls Helgudóttir, biskup Íslands, hátíðina. Að sögn lögreglunnar í Vestmannaeyjum fór hátíðin vel af stað og virðast gestir komnir til þess að skemmta sér og öðrum.

Lögreglan heldur sem fyrr úti öflugu fíkniefnaeftirliti á Þjóðhátíð. Sex minniháttar fíkniefnamál komu upp í gær og einn ökumaður var stöðvaður vegna gruns um ölvunarakstur.

Nokkrum einstaklingum var jafnframt veitt aðstoð vegna ölvunar. Þá sótti þyrla Landhelgisgæslunnar einstakling sem hafði fallið í fjalllendi í Vestmannaeyjum. Tildrög slyssins eru til rannsóknar hjá lögreglu.