Vestmannaeyjabær hefur ráðið Sigurberg Sveinsson í starf tómstunda-, íþrótta- og forvarnarfulltrúa. Átta umsóknir bárust um starfið en ein þeirra var dregin til baka.

Í tilkynningu frá bænum kemur fram að ráðningarferlið hafi falið í sér mat á umsóknargögnum, starfsviðtöl og upplýsingaöflun frá umsagnaraðilum. Niðurstaða heildarmats bæjarins hafi verið að Sigurbergur væri hæfastur umsækjenda til að gegna starfinu.

Við matið var meðal annars litið til menntunar, starfs- og stjórnunarreynslu, þekkingar á íþróttastarfi, leiðtogahæfni og samskipta- og samstarfshæfni. Þá var tekið mið af frammistöðu í viðtali og umsögnum.

Að sögn bæjarins fellur samspil fagmenntunar Sigurbergs, reynslu hans úr íþróttum og stjórnun, samskiptafærni og framtíðarsýnar vel að þeim fjölþættu verkefnum sem starfinu fylgja. Sérstaklega er einnig vísað til hæfni hans til að leiða umbóta- og þróunarstarf.

Vestmannaeyjabær óskar Sigurbergi velfarnaðar í starfi og kveðst hlakka til áframhaldandi uppbyggingar á sviði tómstunda-, íþrótta- og forvarnamála.