Gott veður, sól og blíða settu svip sinn á hátíðardagskrá dagsins sem hófst í morgun með dorgveiðikeppni SJÓVE og Jötuns á Nausthamarsbryggju. Þátttaka var góð og vegleg verðlaun í boði fyrir m.a. stærsta fiskinn og flesta fiska.

Sjómannafjör var á Vigtartorgi eftir hádegi þar sem séra Guðmundur Örn blessaði daginn. Þá tók við kappróður á kajökum, koddaslagur á sjó og landi, tuðru kvartmíla, sjóstakkasund, lokahlaup og sjómannaþraut. Foosball völlur var á staðnum og líka  blaðrarinn og hoppukastalar. ÍBV var með poppkorn, Kjörís gefur ís og Leikfélagið skemmti og andlitsmálun var í boði TM.

Sjaldan hafa fleiri sést á bryggjunni enda veður eins og best verður á kosið.

Klukkan 20.00 er sjómannadagsskemmtun í Höllinni.  Þar  mun tónlistin sem einkenndi síðustu aldamót ráða ríkjum. Fram koma Beggi í Sóldögg, Einar Ágúst, Jónsi í Í svörtum fötum og Eyjaraddirnar Haffi úr MEMM og Una Þorvalds. Öll syngja þau við takt Bigga Nielsen úr Landi og sonum ásamt Gosunum.

Veislustjóri verður Simmi Vill og boðið er upp á glæsilegt hlaðborð að hætti Einsa kalda.

Myndir Óskar Pétur.