Óvenjulegt og skemmtilegt samstarf varð til á dögunum milli þeirra Jóhönnu Jóhannsdóttur, Jóhönnu Lilju Eiríksdóttur og Kubuneh verslunar. Jóhanna Jóhannsdóttir sem er að byggja bústað hér í Eyjum ásamt eiginmanni sínum, Gísla Hjartarsyni fékk þá skemmtilegu hugmynd að klæða bekkinn í eldhúsinu hjá sér með gallabuxum og langaði að gera það á vistvænan máta.

Hún leitaði því til Kubuneh verslunar til að finna gallabuxur og fékk Jóhönnu Lilju handverkskonu með sér í lið. Jóhanna Lilja saumaði buxurnar saman og bjó til úr þeim áklæði fyrir bekkinn, ásamt púðaveri. Verkefnið tókst einstaklega vel til eins og myndirnar segja til um.