Skólasetning Grunnskóla Vestmannaeyja fór fram í morgun og er skólastarfið nú að hefjast á ný eftir sumarfrí. Nemendur og starfsfólk komu saman við skólasetninguna og mörkuðu þannig upphaf nýs skólaárs.

Athöfnin fór fram í Íþróttamiðstöðinni þar sem skólastjórnendur settu skólann formlega. Farið var yfir það helsta sem fram undan er á komandi vetri, breytingar á starfsmannahaldi voru kynntar og fjallað um verkefnið „Kveikjum neistann“. Jarl tók einnig lagið við athöfnina og lífgaði upp á stundina.

Að skólasetningunni lokinni héldu nemendur yfir í skólabyggingarnar. Þar fór hver bekkur í sína heimastofu, hitti kennara sína og fékk fyrstu upplýsingar um skólastarfið fram undan.

Óskar Pétur Friðriksson, ljósmyndari Eyjafrétta, var á staðnum og fangaði stemninguna við upphaf skólaársins.