Framboðsmál Sjálfstæðisflokksins eru til umfjöllunar í Morgunblaðinu í dag, í grein sem ber yfirskriftina kynslóðaskil í boði í prófkjörum íhaldsins. Þar er sagt frá að yngra fólk skori hið eldra á hólm og konur knýi á af krafti um allt land.

Í Suðurkjördæmi er greint frá að Guðrún Hafsteinsdóttir sé sögð stefna ákveðin á 1. sæti á lista Sjálfstæðismanna og bent er á að hún hafi nýverið fest sér lénið gudrunhafsteins.is. Segir í fréttinni að þar myndi hún skora á Pál Magnússon en hann sé veikari fyrir en ella vegna gagnrýni um að hann hafi ekki stutt flokkinn í bæjarstjórnarkosningum í Eyjum.

Guðrún Hafsteinsdóttir er Hvergerðingur, markaðsstjóri Kjörís og hefur m.a. gegnt formennsku í stjórn Landssamtaka lífeyrissjóða og Samtaka iðnaðarins.