Eygló eignarhaldsfélag ehf., dótturfélag Vestmannaeyjabæjar, skuldar bænum 801 milljón króna vegna uppbyggingar ljósleiðarakerfis í Vestmannaeyjum. Þetta kemur fram í ársreikningi félagsins fyrir árið 2024.
Innviðir félagsins voru nýverið seldir úr félaginu til Mílu sem keypti þá fyrir 705 milljónir, fjárfestingu sem nam 750 milljónum en einnig tapast 50 milljónir í vaxtatekjur. Njáll Ragnarsson er stjórnarformaður Eygló eignarhaldsfélags.
Tapar bærinn á fjárfestingunni?
Aðspurður hvort bærinn tapi tæplega 100 milljónum á uppbyggingunni segir Njáll að skuldir félagsins séu um 800 milljónir samkvæmt ársreikningi, en heildarfjárfestingin sem Eygló hefur ráðist í sé um 750 milljónir.
„Mismunurinn er að stærstum hluta kostnaður við lánalínu frá Vestmannaeyjabæ sem ber vexti tengda stýrivöxtum Seðlabankans auk álags. Í því lánaumhverfi sem ríkt hefur síðustu ár hefur bærinn því borið töluverðan fjármagnskostnað. En fjárfestingin sjálf nemur um 750 milljónum og það er í raun það sem Míla kaupir.“
„Eitt af því sem ég er hvað stoltastur af”
Spurður um rekstur félagsins fyrir söluna segir Njál að það séu um 700 áskriftir í mánuði í gegnum kerfi félagsins. „Eftir því sem tengingum fjölgar, fjölgar áskriftum að sama skapi.“ Hann segir jafnframt mikla ánægju með að samningar hafi tekist.
„Ég er afskaplega ánægður með það að salan til Mílu hafi gengið eftir og að bærinn geti með þessum hætti losað fjármagn sem nýtist í innviðauppbyggingu sveitarfélagsins. Nú hefur Míla tekið boltann og ég hef mikla trú á því að þeir muni sinna bæjarbúum með bravör. Þeir hófu strax að leggja kerfi í þau hverfi sem Eygló átti eftir, og hafa í hyggju að efla kerfið enn frekar og auka hraðann meira en Eygló hafði ráðgert.“
Njáll bendir á að sveitarfélög sinni almennt ekki uppbyggingu eða rekstri slíkra kerfa. „Ég fann mjög sterkt á eigin skinni og frá íbúum að skortur á ljósleiðara var farinn að há ekki bara einstaklingum heldur atvinnulífi bæjarins. Þessi uppbygging var því bráðnauðsynleg og er eitt af því sem ég er hvað stoltastur af að hafa komið að á því sjö og hálfa ári sem ég hef setið í bæjarstjórn.“
Sjá einnig: Innviðir Eyglóar seldir á 705 milljónir
