María Fönn Frostadóttir hefur haft í nógu að snúast upp á síðkastið og hefur heldur betur látið til sín taka. Maríu Fönn var afhent forsetamerki Bandalags íslenskra skáta á Bessastöðum í byrjun mánaðarins, sem er mikil viðurkenning fyrir hennar störf. Forsetamerkið byggir á kjarnagildum skátahreyfingarinnar, þar sem lögð er áhersla á persónulegan þroska og framlag til samfélagsins. Til að hljóta merkið fara skátar í gegnum tveggja til þriggja ára ferðalag sem felst í 24 ólíkum verkefnum, allt hannað til að styrkja einstaklinginn og hvetja hann til áframhaldandi vaxtar. María hefur einnig verið virk í tónlistinni og kom hún nýverið fram með Einari Ágúst og Gosunum og spilar í tveim hljómsveitum. María Fönn er Eyjamaður mánaðarins að þessu sinni. 

Fjölskylda? Foreldrar mínir eru Ingibjörg og Frosti! Ég á þrjár systur; Söndru Dröfn, Bjartey Dögg og Tinna Mjöll. Svo á ég líka hund sem heitir Tindur. 

Mottó? Ég hef þrjú mottó: Lúkasarguðspjall 6:31. Always look on the bright side og eina skoðunin sem skiptir máli í þínu lífi er þín eigin.                                                                                                 

Síðasta hámáhorfið? Mr Queen, mjög mikill kaos en ekkert eðlilega ávanabindandi þættir. 

Uppáhalds hlaðvarp? Distractible. 

Aðaláhugamál? Tónlist, leiklist, myndlist, skátarnir og spil! 

Eitthvað sem þú gerir á hverjum degi sem þú gætir ekki verið án? Ég kíki alltaf á calendar og maps, ég væri alveg týnd í stórborginni án þeirra (enda er Reykjavík þekkt sem borg óttans, mæli ekki með að vera strandaður einhvers staðar því maður fylgdist ekki með strætó). 

Hver eru næstu skref? Nú erum við í Þögn að fara gefa út litla plötu fljótlega, svo það er rosalega spennandi! Annars er ég nú aðallega að einbeita mér að náminu hér í Háskóla Íslands. Hrikalega skemmtilegt nám, sjálf valdi ég leiklistakennarann þar sem hjartað mitt hefur alltaf verið í leiklistinni. Ég er líka nýbyrjuð í annarri hljómsveit og er forseti nemendaráðs hér í Háskólanum svo það er nóg að gera hjá mér:)) 

Hvað er velgengni fyrir þér? Fyrir mér er það velgengni þegar þú getur horft til baka sáttur með sjálfan, að þú hafið þorað að taka þetta fyrsta skref sem skilaði þér á þennan stað. Svo gengur lífið heldur ekki út á að gera engin mistök heldur læra af mistökunum. 

Hvenær kviknaði áhugi þinn á skátunum og hvenær byrjaðir þú? Ég hef verið í skátunum síðan ég man eftir mér, byrjaði formlega um sjö ára í dreka skátunum. Skátarnir hafa mótað mig sem manneskju og ég er mjög þakklát að þeir hafa fylgt mér í gegnum lífið. 

Hvernig upplifun var það að fá forsetamerkið afhent á Bessastöðum? Það var rosalega súrrealískt að mæta á Bessastaði til að hitta forsetann. Það er ekki á hverjum degi sem maður er boðaður á Bessastaði til að fagna eigin afrekum. Forsetamerkið hefur alltaf verið á tékklistanum mínum en ég vissi ekki hvort mér myndi takast þetta svo það var virkilega góð tilfinning að sitja þarna með hinum verðandi forsetamerki höfunum. Ég er nú 1465 skáti í heiminum til að hafa hlotið þennan heiður og ég verð að eilífu þakklát fyrir það að hafa fengið þetta tækifæri. Forsetamerkið er alls ekki endinn heldur viðurkenning fyrir þann einstakling sem ég hef orðið og þá hluti sem ég hef gert í gegnum árin. 

Hvað er það skemmtilegasta við sönginn að þínu mati? Það skemmtilegasta við sönginn eru líklega tækifærin sem ég hef fengið, í gegnum söngferilinn hef ég fengið að kynnast ótrúlega mörgu skemmtilegu fólki. Það er virkilega dýrmætt að fá að vera hluti af senunni hérna á Íslandi og að fá tækifæri til þess að tjá mig og sýna heiminum hver ég er. Auk þess vona ég að það sem ég skapa hvetur aðra til þess að skapa eitthvað:)) Svo þykir mér líka bara ofboðslega gaman að syngja. 

Hvernig undirbýrð þú þig áður en þú stígur á svið? Ég reyni að taka litlar upphitanir og minna sjálfa mig á að í stóra samhenginu skiptir það ekkert máli ef eitthvað fer úrskeiðis, upplifunin skiptir mestu máli og ég þarf bara að muna að njóta og hafa gaman. 

Eitthvað að lokum? Lífið er of stutt til að lifa því ekki fyrir sjálfan þig.