Tveir íbúafundir verða haldnir í Þekkingarsetrinu við Ægisgötu í dag 4. apríl þar sem íbúum gefst tækifæri til að taka þátt í mótun nýrrar Sóknaráætlunar Suðurlands.

Annars vegar íbúafundur um atvinnumál og nýsköpun í hádeginu verður haldinn kl. 12:00 til 14:00. Í boði verður súpa að hætta Einsa kalda. Síðar í dag kl. 16:00 til 18:00 verður svo íbúafundur um menningarmál og verður þar boðið upp á kaffihressingu.

Niðurstöður íbúafundanna munu, ásamt niðurstöðum annara íbúafunda í landshlutanum, leggja grunn að stefnum landshlutans í málaflokkunum. Niðurstöður íbúafundanna í Vestmannaeyjum verða jafnframt afhentar sveitarfélaginu og kunna þá að nýtast jafnt sveitarfélaginu og landshlutanum í heild í þeim málefnum.

„Það er markmið okkar að þátttaka verði góð svo áhrif og áherslur íbúa komist til skila inn í nýja Sóknaráætlun Suðurlands 2020 til 2024. Með von um góða þátttöku og gott samstarf,” sagði Þórður Freyr Sigurðsson, sviðsstjóri Þróunarsviðs SASS og verkefnastjóri Sóknaráætlunar Suðurlands.