Í morgun var haldin afar áhugaverð ráðstefna í Sagnheimum í tilefni þess að í ár eru 170 ár liðin frá því að Íslendingar settust fyrst að í Vesturheimi. Elsta Íslendingabyggðin er í  bænum Spanish Fork, Utah en þar settust þrír einstaklingar að þann 7. september 1855. Það voru þau hjónin Samúel Bjarnason og Margrét Gísladóttir frá Kirkjubæ í Vestmannaeyjum og Helga Jónsdóttir frá Landeyjum.

Bryggjan í Sagnheimum var þéttsetin og voru gestir frá Vesturheimi í miklum meirihluta. Margir tóku til máls og sögðu frá tengslum sínum við Ísland og Vestmannaeyjar. Flestar mjög persónulegar og ljóst að gamla landið og ekki síst Vestmannaeyjar eiga sér sess í hjörtum fólksins. Ekki síst þeirra sem hingað hafa komið til að boða trú Mormóna sem ungir menn. Auk þess fluttu ríkisstjórinn í Utah og bæjarstjórarnir í Spanish Fork og Vestmannaeyjum ávörp.

Fram til 1914,  fluttust til Utah  rösklega 400 Íslendingar, þar af helmingurinn frá Vestmannaeyjum. Flestir þeirra settust að í Spanish Fork og afkomendur þeirra eru ótrúlega margir ennþá búsettir þar. Í heildina er talið að fimmti hver Íslendingur hafi yfirgefið ættjörðina og sest að í Kanada og Bandaríkjunum. Saga Utah-fara er hins vegar einstök, auk þess sem hún er nátengd sögu Vestmanneyja.

Þá var þess einnig minnst á ráðstefnunni að 50 ár eru frá endurvakningu trúboðs á Íslandi.

Síðar í dag verður farið um Heimaey og m.a. að minnismerki um þá sem héðan fluttu til Utah vestur á Hamri. Í kvöld er veisla í Eldheimum og tónleikar þar sem Hljómsveitin Skógarfoss kemur fram.