Þórhallur Helgi Barðason er ekki maður einhamur, syngur, kennir söng, yrkir, gefur út ljóðabækur, stjórnar kórum og nær að hrífa fólk með einlægum upplestri úr kvæðum sínum. Allt fékk þetta að njóta sín á yndisstund á fimmtudagskvöldið í Einarsstofu. Aðalstefið var upplestur á ljóðum Þórhalls við undirleik hljómsveitar Þóris Ólafsson. Sjálfur tók Þórhallur lagið og náði svo sannarlega að hræra hjörtu karla og ekki síst kvenna sem mætt voru.
Þórhallur Helgi Barðason Eyjamaður, söngvari, söngkennari og skáld frá Kópaskeri gaf á árinu út ljóðabókina, Um yfirvegaðan ofsa sem er hans fimmta. Fyrri bækur hans eru, Þegar Árni opnaði búrið 1994 og þríleikurinn, Bleikir himnar, Mar og Bygging trjáhýsa í íslensku birki 2017.
Þórhallur sýndi að hann er góður söngvari og lét sig ekki muna um að lyfta Draumalandi Sigfúsar Einarssonar í hæstu hæðir þar sem Kitty geislaði í undirspilinu. Söng nokkur lög Tólfta september og af meiri tilfinningu en maður á almennt að venjast við undirleik hljómsveitarinnar.
En þetta var bara upphaf veislunnar. Karlakórinn sýndi hvað í honum býr undir stjórn Matthíasar Bogasonar sem einnig lék undir. Hápunkturinn var lestur á ljóðum Þórhalls við undirleik hljómsveitarinnar sem auk Þóris Ólafsson á hljómborð, þeir Jarl Sigurgeirsson á bassa, Gísli Stefánsson á gítar og séra Viðar Stefánsson sló trommur af mikilli íþrótt.
Féll tónlistin vel að upplestri Páls Magnússonar, séra Guðmundar Arnar Jónssonar og Þórhalls. Ljóðin fjölbreytt þar sem brugðið er upp myndum úr lífi skáldsins, sumum skondnum, önnur á mörkum fáránleikans en hæst stóðu ljóð um ást á dóttur, ástinni í lífi manns og þungbærum föðurmissi. Öllu lýst á myndrænan en um leið persónulegan hátt. Útkoman notaleg stund með smá skammti af trega og söknuði en líka gleði þar sem allir lögðu sig fram.
Kærar þakkir fyrir fallega og vandaða kvöldskemmtun.
