Í fyrsta sinn var sveinspróf í húsasmíði haldið í Framhaldsskólanum í Vestmannaeyjum um sjómannadagshelgina. Alls þreyttu tíu nemendur prófið og stóðust það allir. Segir Helga Kristín Kolbeins, skólameistari FÍV, að um mikilvægan áfanga fyrir iðn- og starfsnám í Eyjum sé að ræða.

„Þetta eru mjög ánægjuleg tímamót fyrir skólann og samfélagið allt. Það hefur lengi verið markmið okkar að geta boðið upp á alla helstu þætti námsins hér í heimabyggð, þar á meðal sveinspróf,“ segir Helga Kristín.

Sveinspróf eru lokapróf í löggiltum iðngreinum og staðfesta að nemendur hafi náð þeirri faglegu hæfni sem krafist er til að starfa sem sveinar í sinni grein. Prófið fór fram dagana 5.–7. júní í húsnæði skólans.

Að sögn Helgu skiptir miklu máli fyrir nemendur að geta lokið þessum áfanga í Vestmannaeyjum.

„Fyrir nemendur er þetta mikill ávinningur. Þeir þurfa ekki að fara upp á land til að taka prófið heldur geta lokið náminu hér heima. Það styrkir jafnframt stöðu skólans sem miðstöð iðn- og starfsnáms í Vestmannaeyjum,“ segir hún.

Nánar í næsta blaði Eyjafrétta.