„Ég var einn vetur í gítarnámi við Tónlistarskólann í Vestmannaeyjum, sennilega árið 1974 eða 1975. Tók svo gítarinn upp 2006 eftir tæplega 30 ára hlé og hóf að semja lög og texta 2011, samdi 13 lög í Eyjum og sex í viðbót eftir að ég flutti á höfuðborgarsvæðið.

Keypti mér píanó í Covid og tvö af lögunum eru samin á það og önnur á gítar.

Er nú að æfa mig á ukulele og vonandi kemur einhvern tíman lag á það,“ segir Eyjakonan  Guðrún Erlingsdóttir sem heldur tónleika í Hjallakirkju  kl. 16.00, laugardaginn 15. október. „Það eru allir velkomnir og það væri gaman að fagna tímamótunum með vinum, ættingjum og samferðarmönnum,“ bætir Guðrún við og heldur áfram að rekja tónlistarferilinn.

„Ég á einnig yfir þrjátíu þýðingar og texta við þrjú íslensk lög. Gaf út mitt fyrsta lag fyrir jólin 2021 sem heitir Friður á jólanótt og var sungið af Helgu Möller. Ég hélt tónleika í Salnum í Kópavogi 2016 með 15 af lögunum mínum og fjögur með textum sem ég þýddi.“

Guðrún byrjaði að koma fram með Lofgjörðarhóp Aglow í Eyjum. Söng í Kór Ástjarnarkirkju í Hafnarfirði 2014  til 2017, Kór Smárakirkju 2018 til 2019, Rokkór Íslands frá 2020 og Vox Gospel frá 2012.

„Dagskrá tónleikanna á laugardaginn verður fjölbreytt og eru öllum opnir. Ég vonast til að sjá sem flesta á tónleikunum sem haldnir eru í tilefni 60 ára afmælis míns þremur dögum síðar,“ sagði Guðrún sem hlakkar til.