Að þessu sinni byrjaði metnaðarfull dagskrá Goslokahátíðar óvenju snemma. En á föstudaginn opnaði einn fremsti myndlistarmaður landsins Jón Óskar sýningu í Eldheimum á nokkrum af sínum mögnuðu verkum. Sýningin er liður í goslokahátíðinni og verður svo opin áfram út sumarið á afgreiðslutímum safnsins.

Um kvöldið mætti svo hljómsveitin Hálft í hvoru og rifjaði upp gamla takta.  Hljómsveitin var að koma saman aftur eftir langt hlé, en hún var tíður gestur í Eyjum fyrir aldamótin. Sveitin á m.a. hið sígilda Þjóðhátíðarlag „Alltaf á Heimaey“  og Goslokalagið í ár er flutt af sveitinni, en hljómsveitarmeðlimurinn Ingi Gunnar Jóhannsson samdi lagið. Það var því margt um manninn og góð stemming í Eldheimum á föstudaginn.