Eyjamaðurinn Tómas Bent Magnússon var í byrjunarliði Hearts í 0-3 útisigri gegn Stenhousemuir í 8-liða úrslitum skoska deildarbikarsins í fótbolta í gærkvöld. Stenhousemuir leikur í næstefstu deild í Skotlandi og er á toppnum þar. Hearts situr í þriðja sæti skosku úrvalsdeildarinnar.

Tómas lék á miðjunni hjá Hearts og spilaði 65 mínútur. Hann lagði upp fyrsta mark liðsins sem JJ Williams skoraði á 35. mínútu leiksins. Roger Mato skoraði annað mark Hearts fjórum mínútum síðar og Yan Dhanda innsiglaði sigurinn stundarfjórðungi fyrir leikslok.

Hearts er því komið í undanúrslit skoska deildarbikarsins en það er ekki ljóst hverjum liðið mætir þar, þar sem hinir leikirnir fara fram um helgina.