Kvennalið ÍBV fær topplið Breiðabliks í heimsókn í Bestu deild kvenna í dag. Leikurinn fer fram á Hásteinsvelli og hefst klukkan 14:00.

Bæði lið hófu keppni í efri hluta deildarinnar með sigri. ÍBV vann Þrótt 4–3 í fjörugum leik á Hásteinsvelli en Breiðablik hafði betur gegn Grindavík/Njarðvík, 4–1. Breiðablik er í efsta sæti deildarinnar með 40 stig, jafnmörg og FH, en Kópavogsliðið er með betri markatölu. ÍBV er í þriðja sæti með 30 stig, fjórum stigum á undan Stjörnunni.

Með sigri í dag geta Eyjakonur styrkt stöðu sína í þriðja sætinu og um leið minnkað forskot Breiðabliks í sjö stig. Leikurinn á Hásteinsvelli er sá fyrsti af þremur leikjum umferðarinnar í efri hlutanum. Þróttur tekur á móti Stjörnunni á morgun og þá mætast einnig Grindavík/Njarðvík og FH.