Í gær var greint frá því hér á Eyjafréttum að enn sé beðið eftir efni til að setja í Hásteinsvöll og er hann því ekki leikfær. Áætluð afhending á innfylliefninu er eftir 2 vikur, sagði í fundargerð framkvæmda- og hafnarráðs í vikunni.

Framundan er TM-mót ÍBV og koma til Eyja 112 lið til að taka þátt í mótinu. Ellert Scheving Pálsson, framkvæmdastjóri ÍBV íþróttafélags segir í samtali við Eyjafréttir að auðvitað hefðu þau viljað spila á Hásteinsvelli á mótinu en svo verði ekki.

„Hugmyndir voru uppi um það að 5.flokkur kvenna myndi vígja völlinn á mótinu, það hefði verið skemmtilegt. Við undirbúning og skipulag mótsins höfðum við þó varann á og gerðum ekki ráð fyrir Hásteinsvelli. Það truflar ekki leikjaplanið að missa Hásteinsvöll. Það skal tekið fram að landsleikurinn sem venjulega er spilaður á Hásteinsvelli verður spilaður á Þórsvelli,” segir Ellert en þess má geta að TM-mótið hefst á fimmtudaginn nk.

  Tafir á afhendingu innfylliefna