Ritstjóri vefmiðilsins Eyjar.net, Tryggvi Már Sæmundsson, hefur efnt til undirskriftasöfnunar vegna þeirrar ákvörðunar Þjóðhátíðarnefndar að afbóka Ingólf Þórarinsson, Ingó Veðurguð. Eins og fastagestum hátíðarinnar er kunnugt átti Ingó að stýra hinum vinsæla brekkusöng á sunnudagskvöldinu að vanda. Einnig hafði komið fram í tilkynningu fyrir helgi að Ingó yrði hluti af dagskrá laugardagsins þar sem hann fengi tækifæri til þess að flytja í fyrsta sinn í Herjólfsdal þjóðhátíðarlagið sitt 2020 “Takk fyrir mig”.

Í gær var það svo tilkynnt að skemmtikrafturinn hefði verið afbókaður og kæmi ekki fram á hátíðinni í ár. Kemur það í beinu framhaldi af nafnlausum sögum hugsanlegra fórnarlamba sem segja tónlistarmann hafa áreitt sig kynferðilega með einum eða öðrum hætti. Greint hefur verið frá þeim í flestum fjölmiðlum. Þjóðhátíðarnefnd gaf þó engar skýringar á afstöðu sinni í málinu. Eins og fram kom í tilkynningunni.

Í framhaldinu hefur skapast mikil umræða á vefmiðlum og hefur Ingó sjálfur gefið út að hann muni leita réttar síns í málinu, eins og fram kom á Vísi.is.

Tryggvi Már Sæmundsson, ritstjóri Eyjar.net og útflutningsstjóri, hefur nú stofnað undirskriftalista til þess að mótmæla ákvörðun Þjóðhátíðarnefndar eins og fyrr segir. „Í gær tilkynnti þjóðhátíðarnefnd að Ingólfur Þórarinsson kæmi ekki fram á Þjóðhátíð í ár. Með fylgdi texti um að þessi ákvörðun nefndarinnar svaraði fyrir sig sjálf og yrði ekki rædd frekar af hennar hálfu. Ekkert nýtt hafði komið fram í umræðunni um málið milli þess að Ingó var tilkynntur til leiks þar til að nefndin bognaði og tilkynnti um afbókun listamannsins,“ segir Tryggvi í grein sinni. “Kjarni málsins er þessi: Það er ótækt með öllu að dómstóll götunnar stjórni því hverjir komi fram á viðburðum á Íslandi. Engin kæra liggur fyrir og því er engin rannsókn í gangi af hálfu lögreglunnar.”

Tryggvi segir að það sé mikilvægt að landsmenn aðstoði nefndina við að endurskoða ákvörðunina og ráða Ingó að nýju til þess að stýra brekkusöngnum og koma fram á Þjóðhátíð. Undirskriftalistinn er aðgengilegur hér og þegar þessi frétt er rituð höfðu tæplega 600 einstaklingar skráð sig.