Kosið verður til Alþingis laugardaginn 25. september 2021. Þetta kemur fram í forsetabréfi um þingrof og almennar kosningar sem birt var á vef Stjórnartíðinda fimmtudaginn 12. ágúst.

Í forsetabréfi um þingrof og almennar kosningar segir meðal annars að samkvæmt tillögu forsætisráðherra og með vísan til 24. gr. stjórnarskrárinnar, nr. 33/1944, sé ákveðið að þing verði rofið 25. september 2021 og að almennar kosningar til Alþingis fari fram sama dag.

Utankjörfundaratkvæðagreiðsla hefst í dag föstudaginn 13. ágúst hjá embætti sýslumanns í Vestmannaeyjum á hefðbundnum opnunartíma sýsluskrifstofu en lengdur opnunartími vegna atkvæðagreiðslunnar verður auglýstur síðar.