Hluti af nýju listaverki Ólafs Elíassonar í Vestmannaeyjum var formlega opnað í gær á nýja hrauninu að viðstöddum meðal annars listamanninum sjálfum og Hönnu Katrínu Friðriksson atvinnuvegaráðherra.

Listaverkið ber vinnuheitið Sjónarhorn Flakkarans (The Wanderers Perspective) og skiptist í tvo meginhluta. Annars vegar er um að ræða nýjan útsýnisskála sem tekinn var í notkun í gær og hins vegar göngustíg sem lagður verður umhverfis gíg Eldfells.

Vernd og öryggi hluti af verkefninu

Göngustígurinn verður samkvæmt upplýsingum frá Vestmannaeyjabæ órjúfanlegur hluti af listaverkinu sjálfu, en honum er einnig ætlað að verja viðkvæma náttúru svæðisins og bæta öryggi þeirra ferðalanga sem heimsækja Eldfell.

Meðal annars af þeirri ástæðu hlaut verkefnið hæsta styrk úr Framkvæmdasjóði ferðamannastaða við nýjustu úthlutun atvinnuvegaráðuneytisins, alls um 107 milljónir króna. Með því er verkefnið sagt fullfjármagnað.

Stefnt að verklokum í byrjun næsta árs

Gert er ráð fyrir að framkvæmdir við göngustíginn hefjist innan skamms og að þeim verði lokið fyrir áramót. Ef áætlanir ganga eftir verður listaverkið fullfrágengið fyrir 23. janúar á næsta ári þegar 54 ár verða liðin frá upphafi Heimaeyjargossins árið 1973.

Hér að neðan má sjá myndband Halldórs B. Halldórssonar frá vígslunni í gær. Myndband frá dagskránni í Safnahúsinu fyrr um daginn má hins vegar sjá hér.