ÍBV tekur á móti Val á Hásteinsvelli í dag. Flautað verður til leiks klukkan 16:00 og stefna Eyjamenn á að halda áfram góðu gengi sínu í Bestu deild karla.

Eyjamenn fara inn í leikinn í 9. sæti deildarinnar með 12 stig eftir tólf leiki. Í síðustu umferð gerði ÍBV 1:1 jafntefli við FH í Kaplakrika og hefur nú tekið tíu stig úr síðustu fjórum leikjum. Liðið hefur því verið á góðri siglingu eftir erfiða byrjun á tímabilinu.

Valur er í 5. sæti deildarinnar með 19 stig, en hefur leikið einum leik meira en Eyjamenn. Liðið vann Þór 4:2 í síðustu umferð en engu að síður urðu breytingar á þjálfaramálum í vikunni þegar félagið ákvað að segja Eyjamanninum Hermanni Hreiðarssyni upp sem þjálfara meistaraflokks karla. Chris Brazell, aðstoðarþjálfari liðsins, mun stýra Valsmönnum út tímabilið.

Valur hafði betur, 2:1, í fyrri viðureign liðanna á tímabilinu og eiga Eyjamenn því harma að hefna á heimavelli í dag. Líkt og áður segir hefst leikurinn klukkan 16.00 á Hásteinsvelli. Einn annar leikur fer fram í Bestu deild karla í dag en þar tekur ÍA á móti Breiðabliki. Sá leikur hefst klukkan 14.00.