Ísfé­lag hf. hefur birt árs­hluta­reikn­ing félagsins fyr­ir fyrri hluta árs­ins 2025. Fram kemur í tilkynningu að fé­lagið hafi verið rekið með tapi á tíma­bil­inu, sem að mestu má rekja til mik­ill­ar veik­ing­ar banda­ríkja­doll­ars, upp­gjörs­mynt­ar Ísfé­lags­ins.

Haft er eftir Stefáni Friðrikssyni forstjóra að afkoma á fyrri árshelmingi hafi markast af mikilli veikingu dollars, uppgjörsmyntar félagsins. „Hrein fjármagnsgjöld voru 20,8 m.USD, þar af voru 13,2 m.USD vegna veikingar dollars. Hins vegar hækkaði bókfært verðmæti í dóttur- og hlutdeildafélögum um 12 m.USD sökum gengisbreytinga. Svo til engin loðna var veidd á vetrarvertíðinni sem hafði einnig neikvæð áhrif á reksturinn.”

Félagið fjárhagslega stöndugt

„Fjárfestingar á tímabilinu voru umtalsverðar og námu þær 84,1 m.USD. Á móti seldi Ísfélagið eignir fyrir um 16,6 m.USD. Fjárfestingarnar voru fjármagnaðar með lántöku en félagið gerði lánasamning við hóp banka í byrjun árs 2025. Í maí fékk félagið afhent glæsilegt uppsjávarskip, sem hlaut nafnið Heimaey VE. Eldra skip með sama nafni var selt til Noregs. Byggð var frystigeymsla í vetur á Þórshöfn, ásamt því að lokið var við stækkun fiskimjölsverksmiðju félagsins í Vestmannaeyjum. Ennfremur tók Austur Holding, sem Ísfélagið á 29,3% hlut í, þátt í hlutafjáraukningu í laxeldisfyrirtækinu Kaldvik.

Félagið er fjárhagslega stöndugt og fyrir hendi er geta hjá félaginu til að fjárfesta og styrkja rekstur þess til lengri tíma,” segir hann.

Vonbrigði að sjá þorskkvótann dragast stöðugt saman

Stefán segir að markaðir hafi verið góðir á tímabilinu. „Verð á þorski og ýsu hefur hækkað mikið milli ára og verð á frosnum makríl- og síldarafurðum hefur haldist hátt. Heildarafli skipa félagsins á fyrri helmingi ársins var 22.600 tonn samanborið við tæp 25.900 tonn á sama tímabili árið 2024. Framleiddar afurðir voru 13.200 tonn samanborið við 14.700 tonn á sama tímabili í fyrra.

Það hafa verið vonbrigði að sjá þorskkvótann dragast stöðugt saman á milli ára, en hann hefur dregist saman um tæp 4.000 tonn frá upphafi þessa áratugar, og verður á nýju fiskveiðiári, sem hefst nú í september, aðeins rúm 10.000 tonn.

Enn og aftur vil ég vekja athygli á og ítreka nauðsyn þess að auka hafrannsóknir. Með bættum hafrannsóknum eykst þekking okkar á lífríki hafsins og með því minnkar öll óvissa. Með því að draga úr óvissu verður hægt að ákveða leyfilegan heildarafla úr einstökum nytjastofnum á nákvæmari og betri hátt.”

Makrílveiðar gengið vel

„Vonandi sjáum við loðnuvertíð á næsta vetri en það er mikilvægt að loðnustofninn sé sterkur, bæði fyrir þorskinn og aðra stofna sem nýta loðnuna sem fæðu, sem og okkur sem veiðum loðnu og þá markaði sem treysta á loðnuafurðir frá Íslendingum. Hætta er á að einhverjir loðnumarkaðir minnki eða hverfi alveg ef ekki veiðist loðna í vetur. Makrílveiðar sumarsins hafa gengið vel. Verð fyrir makríl- og aðrar uppsjávarafurðir hefur verið hátt.”

Málið snýst að því er virðist um menn en ekki málefni

„Ástæða er til að hafa áhyggjur af neikvæðu viðhorfi valdhafanna til sjávarútvegs. Mikil hækkun veiðigjalds og hvernig staðið var að verki við samningu frumvarpsins um þau og þinglega meðferð þess sýnir að  þeir sem stjórna landinu kæra sig kollótta um verri samkeppnisstöðu greinarinnar, minni getu til fjárfestinga og lægra skattspor til framtíðar. Þetta viðhorf kom skýrt fram í sjónvarpsviðtali við forsætisráðherra í lok júní þar sem hún sagði að þessi leiðangur snérist um 4 til 5 fjölskyldur, þ.e.a.s. málið snýst að því er virðist um menn en ekki málefni, m.ö.o. er hér verið að fara í manninn en ekki boltann eins og sagt er á íþróttamáli,“ segir Stefán Friðriksson, forstjóri.